بقلم/ محمدعلي حامدالراو:
في الحلقة السابقة تركنا الاستاذ قسم الباري دق باب مكتب المدير ودخل علي المدير والمدير ما ناقش الفلم خالص
وقدم ليهو الطلب وجلس في الكرسي بجواره
المدير
أستاذ محمد زين بدأ يقرأ في الطلب العجيب ويرفع في نضارتو ويعاين للاستاذ مستغرب وقال ليهو:
ده شنو ؟؟
شرح ليهو
المدير قال ليهو :
دكتور تروتا ده ما حقيقه ده شخصية خيالىة
قال ليهو:
ابدا حقيقة وهو الآن معانا في المدرسة
قال ليهو:
وين ؟؟
قال ليهو:
مع أستاذ الراو في مكتبو
والطلب ده القال ليك اعملو منو
قال لي أستاذ الراو
والمدير أكان بعرف خواجيتى وجلس معاهو كم مرة وانفجر ضاحكا وقال ليهو:
انت وقعت في شراك الراو
اعمل حسابك منو المره دي جاتك سلامة
سلاخية
والله ايام خواجيتي
كانت أيام جميلة جدا وكان فيها برامج مصاحب مفتوح مشيت بيهو سوق الزعف وسوق الابل وركبتو ناقة ومشينا البحر ومصعب يحوم بيهو الليل كلو مع اصحابوا وأجمل حاجة انا م كنت بركب عجلتي كنت طوالي بعمل exchange مع خواجيتي للعجلات وأسوق عجلة خواجيتي واديهو الدبل حقتي ي الله الاتاريهو متمتع شديد والله الظلت اكان محفر جنس حفر كسرت لي عجلتي الجميلة وعملت لي غضروف، لكن أول ما اركب العجلة حقت خواجيتي طوالي تجيني غيبوبة الزهو السياحي والانعتاق (الاندفاقستي) وما تسألني عن( الاندفاقستي) يعني شنو؟؟؟ لاني انا ذاتي زيك ماعافا وأشعر عندما اطلع الظلت كأني عملت take of والتفت يمنة ويسري (زي جنى العرب الأهلو متعوجين ليهو ) واقول: لي خواجيتي الكع الكع شويه ويقول لي: الكع يأني ماذا؟؟؟؟ يقصد(يعني شنو) وأنا بقول ليهو: يعني hurry up بي الاسلانق عربي لحدي م حفظا يوم أكان ماشي مع مصعب الصاوي مصعب اتأخر شوية، قام خواجيتي قال ليهو: الكع بكاف معطشة مصعب يموت من الضحك المهم و بقى يأكل المرارة وربما قال حرم ونسى الانجليزي ونحنا ماعرفنا ولا كلمة منو، والحكمة هو صغير في العمر ابدا ماتم العشرين سنة لكنه زكى ولماح وصورنا كترت صور، أنا خائف يكون عملو كتاب اسمو ((راوووونتي Rawoon tea على وزن خواجيتي)) عشان كدة أنا سبقتو وعملته مذكرات خواجيتي قبالو. وبعد أسبوع حافل بالجمال والمتعه قرر خواجيتي أن يواصل رحلته الى الكرتوم (الخرطوم).وفي العصر قال لي: راووون أنا امبارح بسافر كرتوم يقصد غدا وانا فطور بي (ثن مظا) طبعا فهمناه انو أم رقيقة اسمها Thin mather الصباح عملنا ليهو أم رقيقة لايوقه وبقا يأكلها زي الطلقة ويقلوزا تمام ويقطع دابرا من صحنا، وبعد يشبع يتدشا ويقول الهمد لله. وركب العجلة واتحرك وهو يبدل على الترس ، وأنا أبكي وهو يبدل ووليداتي يبكوا. وكان يوم حزين مشيت لي المدرسة حزين بدون خواجيتي والطلاب وين ي أستاذ خواجيتنا راووون؟؟؟ .
قلت ليهم سافر. وبديت أفكر ياربي يكون عامل كيف مع رمال قباتي وحجارة جبل أم علي وكيف مع حر الشمس الشديد. ونحن في المدرسة نلعب في الكرة الطائرة العصير فاذا بالطلاب يصرخون خواجة أستاذ الراو جاء راجع. وصل مرهق وعطشان خالص وشيهو زي الفشفاش من العطش الشديد وسلم علينا يالاحضان (سلام الكتوف) وسألته عن الخبر فقال ان الطريق وعر A lot of sandرمال كتيرة وحجار وشوك والدراجة لا تستطيع التحرك بسهولة قلت ليهو انا ما قلت ليك الفراغنة كتيرة فقال لي فراغه ياني ماذا قلت ياربي فرناغة دي ياربي يقولوها ليهو كيف؟؟؟؟ فقلت له soft sand فقالyes yes الهم عاد مرة أخرى وذهبنا إلى البيت وقرر أن يركب اللواري وفي الصباح اخذته ومعي صديقه مصعب محمد الصاوي الي الكمسنجي عمنا حاج حامد عليه رحمة الله بجوار دكان عبد الله أحمد سعد في سوق الدامر القديم ووجدنا لوري شاحن اسمنت أبينا نركبوا عليهو مع انو بتاع اللوري قال لينا خاتين فوق الاسمنت حبال لكن طلعنا ووجدنا الأسمنت التقول مرقوه من الفرن الان وانتظرنا حتى جاء لوري شاحن فاصوليا لانو بارد وثابت في الدقائق والله نحن في سفر اللوري دي اخدنا دروس وكورسات واتفقنا مع الكمسنجي عمنا حاج حامد وربط العجلة وراء اللوري واشترينا ليهو موز زواده فقال no no انا ماداير banana مسكين فما زال العطش يعرش على راسه وقال انا أريد أن اشتري Watermlon ((اماعطشة خور مكابراب) وفعلا مشينا معاه عزل أكبر بطيخة سياحية عند عمك الدبشي شيخ سوق البطيخ بالدامر في ذلك الزمان عليه رحمه الله وسألته ياعم الدبشي البطيخة دي حلوه فقال لينا يااستاذ الراو حلوه دي مرحلة نحنا فتناها بدري قول لي فيها كم حبة؟؟؟؟؟ وشلناها وحجزنا للخواجه فوق التنده وارتحل اللوري كخيال سحاب الهرع
وبعد عام ارسل لي خواجيتي كرت فيه صور جميلة لزهور وطيور عليه Dear Rawoo nمن قريته في إنجلترى واسمها Clovelly (كلوفيلي)( وانا بتذكرها بي ( كلو الفيل حقي) كلوفيلي
واللا ايام يازمن
ببكي واتحسر عليك
ومابقول العشنا كان
وارمي حبة لوم يجيك
لسه راجيك يازمان
بي حبة الذكرى المعاي
عايشة في وجداني جوه
ولسه بتدغدغ حشاي
مع خالص تقديري لك عزيزي المتابع أين ماكنت محبكم
مستر
محمد على حامد الراو
نهر النيل
الدامر
الشعديناب
تنبيه مهم الحاضر يكلم الغائب
مستر راوووون دي درجة علمية منحني لها البروفسير احمد بابكر الطاهر
وماعفي لأي زول ما بقول لي مستر راوون و راووووون دي عندي ليها بوست قادم
بإذن
وهكذا نسدل الستار على قصة خواجيتي
