للشاعر الراحل/ عمر العوض:
فيما يلي تعيد (الساقية برس) نشر قصيدة الشاعر الراحل عمر محمد أحمد العوض، والتي كتبها في خريف العام 1988 في الدامر/ حي الشاعديناب. وذلك بالتزامن مع أمطار غزيرة شهدتها الدامر اليوم.
ملحمة المطر
النص :
قدر ولطف
سبقت عنايتو وكذبت
فال النزل فى الماسية والسيل الجرف
طافت بشارة خيرو مدت
فوقنا اجنحة الملاك
شالتنا بالحب والحنان
براحة من كف الهلاك
ضمتنا فى الليل الشلع
براقو والرعد القصف
****
باريت طيور شعري البتصدح فى غناي
وسرحت لا ضو لا دليل
قدامى فى حيرة عماي
زى قشة فى درب الرياح
شايلاني ماشى بلا هدف
فى رهبة الليل السدل
فوق نجمو تيبانو التقال
الجو ملبد بالغيوم
والريح تكتح بالرمال
كالصيب الفيه الرعود
الداويه والبرق الخطف
من خوفي حسيت بالمكان
من تحتي غاص بى وخسف
جوايا انكشف الخداع
آه يا زمان
كم كنت عايش فى ضياع
كم كنت عايش فى ضياع
ترحالى من خلف السراب
ومراكبى كاسحه بلا شراع
من غيي سادر فى صلف
****
فى الليلة ديك شفت الكتير
حسيت ضآلة ذاتى
بى جنب المجرة الهايلة
والكون الكبير
وفكرت لى السر البضخم
لى دايما فى الوهم حجمى الحقير
شفت رؤاى
قاسيت مخاض العودة
فى الليل المطير
الروح تشبعت امتنان
ومرقت من قيد الحرير
وبلا كتير حبل المودة الكان ربط
بيناتنا حالا اتنتف
****
الموت مصير الضاق حلاوة الدنيا
والعاش فى شظف
والقالو نقاد للجياد
سيافو ماسك من طرف
الدور علينا ونحن فى
درب المنايا بقينا صف
ساكت مشينا ونحن ما
عارفين منو القدامنا فى الطابور وقف
يندهنها من خلف الغيوب
ومضينا ساعة الحين ازف
****
الهمنى يا الله اليقين
واكشف غطا البصر الحديد
خلصنى من خوف المصير
من شهوة العيش الرغيد
من قبضة الاسى والاسف
خلينى بى منظار جديد
من شرفة الحس بالجمال
اصنت المعنى البعيد
انظر معانى الرحمه تزداد اتساع
بين الخرايب والتلف
****
قدر ولطف ساعة كرب
مطر الخميس شخلب حلب
غطى الاماكن كابى كب
وكأنو شريانى ونزف
نازل بعد غيبة سنين
من صب فوقنا وما وقف
وانقض شلاع القلاع
فى كفنو كالصقر الخطف
الموية خرت بالشقوق
ضاقت سباليق الغرف
واتحدرت وسط البيوت
والمجرى في لحظة انسرف
الرعده ترزم والسحاب
من فيض بحور الجو غرف
****
والسيل هدر
لملم خيول غضبو وزحف
لا خل شباك من حديد
لا خل باب لا خل رف
بقت البيوت العامره كالاطلال خراب
مردومه انقاض المبانى اتكومت
عادت كما كانت تراب
اتهايلت فوق السراير
والمراتب والدواليب والتحف
كل العمار فى ساعة بس
اصبح دمار وكأنو لا حوش لا غرف
****
وين الازقة الضيقة
والكورة الشراب
الرفقة والدرب الحنين
النادي والليل والشباب
واللقيا عند المنعطف
اتباعدو الأهل القراب
الجيره والناس الصحاب
وكأنو ما كانت حياه
ومتشابكة من مليون طرف
****
وين جاري لا شلت يداه
الحاني ضواى السدف
فى غيبتى يتفقد جناي
يلقاني شفقان بى لهف
اسراري ما افشاها خان
فى وعدو صادق ما خلف
ايامنا ياما كان صفن
نتقاسمن فى خير وشر
ومحنه فى السر والعلن
خلينا اجمل ذكريات
منقوشه فى حجر الزمن
عبر السنين الحلوة والعمر السلف
****
الليله انهدم البنيتو
فضلت لا دار لا سكن
اصبحت زي انسان غريب
والغربة مرات فى الوطن
اولادى فارشين التراب
وغتاهن الغيم الهتن
الراح بعود والاتى صاير لى زوال
مطِّارده احوال الوجود
لكن منو البقدر يرجع
امسياتنا الما بتقدر بى تمن
****
يا بيتى يا المفروش حنان
الكابى فى اولادى من حر الزمان
انت الوطن القاك بالحجم المصغر
يتسع بيك الزمان
من دون بقاع الدنيا فيك
بلقى راحة بالى اشعر بالامان
****
اذكرك وانا ببنى فيك
رجلي ما ملت مشيك
نصة نهار فرحان اجيك
والدنيا حولك صانة صن
اعينا تمسح خرطتك
وخطانا تشتاق سكتك
ما ظن فى اجمل
من سماحة موقعك او حتتك
اذكرك من ساسك المحفور تحت اضلاعى
جوايا اندفن
دمعاتنا والعرق الغزير
بيهن ترابك انعجن
عند العتب كرمنا ليك
وعيونا يوم تميت بكن
انفاسنا حامن فى سماك
واتورنا فى حوشك مشن
اطفالنا يكبروا والشتول
قامن معاهن واثمرن
يملوها حيطانك صور
فى شخبطاتن احلى فن
****
من سوقنا اختفت العيوش
اتلاشت الكانت تكفى الدنيا لو ما جات ديوش
وينو المكوم كالجبال
والكان مغربل فى البروش
وينو الزمان فارش هنا
التاجر الدايما يصابح بابتسامة زول بشوش
يمكن رحل
فى ناصية فى السوق الجديد
يمكن لقالو هناك محل
الكان يمسكك بالكلام لامن تدوش
دس المحرم واختفى
الكان دفع دم قلبو .. شان ..
يمشى ويزور المصطفى
الشلهمى الفوق الزباين كان يهوش
****
الناس مشت خلف القشور
الواهيه وازدادت لهف
ما فيها واعز من ضمير
لاذمة لا كلمة شرف
اتمنو أسياد الايجار
اتواصلو اصحاب الحرف
وتجارة لفاها الغموض
ما اشرعت ليها الضلف
اخفوها فى وضح النهار
شالوها ليل ما خلو رف
الساهلة من تحت البنوك
والقاسية بى دوران ولف
والسلطة تلهج بالحديث
ميزانا يتقل او يخف
نسمع اغاثة ولا مغيث
لا منحة جاتنا ولا سلف
نتباهى با لنذر اليسير
والحكمة حال الناس وقف
****
اتهدمت كل المخابى وفوحت
ريحة المدسدس بالعفن
القوت مصبن والخلوق
موعودة بى جنة عدن
الكان ملبد فى امان
تحت الخرايب اندفن
السكر اتماص والدقيق
اتبل والعيش انعطن
اتابعت صور الفضايح طفحت
فى السيل كراتين اللبن
****
الناس من الجوع فى صيام
تحت الهجير واقفين صفوف
جا العسكرى وخرب النظام
اخرنا والوارد قليل
فى الانتظار ضاع الزمن
اسمانا فى الادراج نيام
وبحثنا ما لقينا الملف
الدنيا تحرق والكبار
رايق مزاجن من ترف
جلسات تناظر واقتراع
من بدري مدفوع التمن
اوجهنا ضاعت فى الزحام
والقافلة لا قيد لا رسن
اسعار يقفزن فى صعود
ومواهى هابطات من وهن
والحالة اكبر من مواد
نلغيها او دستور يُسن
حرية تاكل من عصب
عينى من عافيتى من عرق البدن
مطلوقة فى وضح النهار
مخنوقة ساعة الليل يجن
مقيود انا .. وشهادتى حر
انسان مشرد فى الوطن
ارسم مداين فى الخيال
يوتويبا لا خوف لا حزن
الدمغه فى الطلب ابتسام
فيها التعامل ذوق وفن
محروسة بالخير والجمال
مكنوسة من كيد المحن
متروسة شوالات رمال
الامضاء عند المؤتمن
والصرفه من ايد العفيف
وهدية مجانى الكفن
حتى المقابر جاهزة صف
****
ضلت مراكبنا البتكسح
لا نجم يهديها لا ربان قدير
كل ما تمرس فى الكلام
يخلف محل سلفو الخبير
قاربنا تايه والظلام
قدامنا والملاح ضرير
قول يا مجير والجوع صبح
فى الدنيا قاسم مشترك
بين المغمض والبصير
نصحى ونواجه كل يوم
نفس المصير
****
الحالة ميئوس من علاجا ومستحيل
لا وصفه تنفع لا ولا
روشته تانيه ولا بديل
الحاله اكبر من بيان
يلقيه فى المجلس وزير
او حتى من نعم اغلبيه ومن خطب
ناريه من اضراب طويل
الحالة استعصت عديل
اصلو الفتق كان مستدير
والراقعة شكلها مستطيل
****
يا موطن النيل والضفاف
فوق حقك الموروث بقيت
عابر سبيلا مستضاف
ما زلت مكسور الجناح
عايش اقل من الكفاف
قبال تفيق من صدمتك
بعد التصحر والجفاف
من حولك اجتمعت محن
متحدة فى اقوى ائتلاف
لا قيات ولاتك ما فتر
فيهن حماسن للخلاف
****
عاين بعد غيبة الغيوم
اتواعدن تانى العصر
فى غفلة تانى وعربدن
سون كلاما شين ومر
اتبهل المطر البنوشل
جايى من غيما كتر
والنيل طمح غطا العوالى اليابسه
سيّل فى الجزر
والسيل رمى القدامو
ما بيعرف يتامى ولاعذر
والساقيه خرت في الشتول
السايلة غرقت .. والتمر
الكان مروق انتكت
اماتو من تقل الشطر
****
اصبحنا فى حالة حرب
اهوالا فوق طاقة الجميع
حرب الطبيعه المي لعب
تغزونا من كل الجهات
بى جيشا- وتسد الدرب
من جبهة الفوق التحت
او جبهة الشرق الغرب
والجود ملبد بالغيوم
والحالة تنذر بالخطر
****
من جبهة الغرب التساب
اصبح مهددنا البحر
من جبهة الشرق انتظار
سيل البطانة الإنحدر
من فوق مقاصدنا السحاب
وجه مدافنو مع المطر
وتحتنا راجينا الذباب
طوقنا بي جند الحشر
****
اتهيج الكرك المخمر
مازج الطين والجيّف
والريحه حامت والبعوض
مالى الشوارع والغرف
الواطه انشقت قعوي
فى راسنا ينبح ما وقف
والدنيا حر
تمشى العقارب فى الظلام
وتلم فوانيسنا الحشر
والكتمة مرتع للذباب
بين الخرايب والحفر
والصحة تنعم بالشخير
اتوسدت كف الأسف
****
تتواتر القصص الطوال
اتباينت بين الحقايق والخيال
واحد يقول: الليلة جابلو النيل نفس
داير يشب فوق الترس
الطامة لو فجأة انكسر
والتانى قال:
نفسي اشتهت طعم الرقاد
ودقست ما جايب خبر
الموية ضايقت الجدار
الدروة خرت فى الظلام
يا ريتا لو صبت نهار
المجرى ما كان انطمر
والرادي جاب آخر خبر
الفاصل اتجه الشمال
والفرصة سانحة للسحاب
ينشر لى ارض الحجر
الكتمة يا النيل فى ازدياد
يا اما ننتظر المطر
ياتو الاخير لنا فى الحساب
والأدهى من غيرو وأمر
****
بعد الكلام كل الحواس الخمسه
فى حالة تكامل وانسجام
فى اليقظة صاحيه وتلتقط
عند المنام
وعصبنا من طول الحذر
طول الترقب فى الظلام
مشدود متل سلك الوتر
****
يا نيل تعود بالخير
على البلد البخوض الملحمة
العانى من جرح الجنون
اسيان مضرج بالدما
العاش مكبل بالقيود
وطموحو فوق نجم السما
اسقيهو من فيضك منى
افتح جداولك للحفيف
ارفع تقانتك هينمه
استبشرت بيك الارض
ملصت ظروفا المحزنه
نزعت غلالات الأسف
اشققت ليك
بكرت بعد التصحر بالعلف
والمعزه تسرح فى امان
رويانة من موية السرف
****
اتهيأت احلى العرايس للزفاف
نسجت من الرمل الزحف
فى الوادى تيبان العفاف
كل الطبيعة ازينت
لبست فساتينا الرهاف
الموج يصفق بالخرير
والطير يغرد فى الضفاف
الفارس العايد سدل
غيماتو فى خدرك سجاف
اصلو العريس من بشتو
متل الخريف من رشتو
بعد التصحر والجفاف
شوق البشويم والرعود
زافاهو لي آخر المطاف
ما بين دعاشك والبخور
عيد النسيمات اللطاف
الزيفة والصندل عبق
بى فوقنا فى ليلة الزفاف
الغيمة صب وانطلق
كل المقيد من خلاف
طولنا ما ضقنا الرضاف
****
الدنيا دولاب ما بتقيف
لى ساقية جارفاها السيول
ما يهمها الطفل اليتيم
ترضيه شان فقد البعول
لا الأرمله العاشت ظروفا القاسية
او عز المصاب
ايامنا فى درب الزمان
قدرا مسطر فى كتاب
لا حظ معاهو ولا صدف
يتهدم القايم مسلح
يبقى بين برش السعف
اصبحنا لا دار لا اثاث
وطموحنا زايد ما وقف
انشا الله لا الفقر الشديد
لا عيشة الدعة والترف
****
سبقت عنايتو وكذبت
فال النزل
فى الماسيه والسيل الجرف
طافت بشارة خيرو مدت
فوقنا اجنحة الملاك
شالتنا بالحب والحنان
براحه من كف الهلاك
ضمتنا فى الليل الشلع
براقو والرعد القصف.
++++++++
الصور لمنزل وغرفة الشاعر عمر محمد احمد العوض وشارع المنزل – الدامر –
الشاعديناب – اغسطس 2022
